Për presidentin e Serbisë, Aleksandar Vuçiq pati zëra se në momentin e fundit, do ta anulonte vizitën për në Moskë.
Mirëpo këto dilema u shuan pasi që i pari i Serbisë ka mbërritur në Rusi dhe do të jetë prezent në ceremoninë që shënon 80-vjetorin e fitores sovjetike ndaj Gjermanisë naziste.
Në kuadër të kësaj vizite, Vuçiq pritet të zhvillojë takim kokë më kokë me homologun e tij, presidentin rus, Vladimir Putin, si dhe pak para vizitës Vuçiq i dërgoj disa fjalë në drejtim të Brukselit.
“Jam i bindur se Serbia do të mbetet në rrugën evropiane. Nëse BE-ja dëshiron të ndëshkojë dikë, le të më ndëshkojë mua. Do ta pranoj ndëshkimin dhe do të kërkoj që të mos e ndëshkojnë të gjithë vendin”, ka thënë Vuçiq
Këtë vizitë të Vuçiqit në Moskë e ka komentuar edhe Ministrja e Punëve të Jashtme në detyrë, Donika Gërvalla, e cila për televizionin polak “TVP” ka thënë se Vuçiq po e zbaton politikën ruse në përpikëri.
“Është vërtet e vështirë të shpjegohet se si, muaj pas muaji, Presidenti serb Vuçiç u tregon të gjithëve se është një përfaqësues i vërtetë i Rusisë”, ka thënë Gërvalla.
Ndërkaq, politikani socialdemokrat, Nenad Çanak, ka treguar arsyet që pse Vuçiq vendosi të udhëtojë për në Moskë.
“Vendimi i Vuçiqit për të shkuar në Moskë është rezultat i frikës së tij të thellë ndaj Putinit. Ai ka frikë për sigurinë e tij personale, duke qenë i vetëdijshëm se Kremlini nuk fal asnjë përpjekje për të menduar në mënyrë të pavarur, e lëre më një kalim në “anën armike”. Udhëtimi në Moskë është gjithashtu një përpjekje për të balancuar, brenda elektoratit të tij, dështimin spektakolar që pësoi në Shtetet e Bashkuara”, ka thënë Çanak për Tëvë1.
Tutje, Politikani socialdemokrat ka kritikuar edhe qasjen e Bashkimit Evropian për raportin me Serbinë, ku sipas tij, diplomatët evropian janë të ngadalshëm dhe të plogësht kur bëhet fjala për të marrë vendime serioze.
“Ekonomia e Serbisë varet të paktën dhjetë herë më shumë nga BE-ja sesa nga Rusia. Vuçiq nuk është një diplomat më i aftë sesa zyrtarët e BE-së të cilët po ashtu janë të ngadalshëm, të plogësht dhe të pavendosur kur bëhet fjalë për të marrë veprime të qarta kundër atyre që minojnë sistemin e vlerave të Bashkimit Evropian. Pra, çfarë mund të pritet kur bëhet fjalë për qëndrimin e tyre ndaj Serbisë, rëndësinë strategjike të së cilës në konfliktin me Rusinë (që është vetëm çështje kohe) burokratët e BE-së vazhdojnë ta nënvlerësojnë rëndë”, ka përfunduar Nenad Çanak
Komisionarja evropiane për zgjerim, Marta Kos, duke folur rreth vizitës së Vuqiçit në Moskë ka thënë se do ta ketë shumë më të vështirë ta ndihmojë Serbinë të qëndrojë fuqishëm në rrugën evropiane.
