Friedrich Merz, lideri i partisë konservatore, ka arritur të sigurojë postin e kancelarit të Gjermanisë pas një votimi të fshehtë në Bundestag, që u zhvillua përmes një procesi të tensionuar dhe pas disa orësh pasigurie.
Lidhur me këtë ka reaguar deputeti i Vetëvendosjes, Hekuran Murati i cili ka krahasuar sjelljen e partive gjermane me atë të partive opozitare në Kosovë të cilat nuk e kanë pranuar një mënyrë të tillë votimi për zgjidhjen e ngërçit dhe konstituimin e Kuvendit.
Murati ka thënë se sjellja e partive atje është për t’u marrë shembull pasi megjithëse votimi për Kancelar në herën e parë dështoi të prodhonte rezultat, askush nuk e bëri temë ndërrimin e kandidatit dhe askush nuk kërkoi qeveri tranzicioni.
Sipas tij bllokada që opozita po vazhdon t’ia bëjë konstituimit të Kuvendit është jashtë çdo arsyeje.
“ME VOTIM TË FSHEHTË, Bundestagu Gjerman sapo votoi për Kancelarin Friedrich Merz. Votimi i fshehtë është formë demokratike për shprehje të vullnetit të lirë të deputetëve, dhe do të mundësonte zgjidhjen e ngërçit për konstituim të Kuvendit edhe tek ne. Bllokada që opozita po vazhdon t’ia bëjë konstituimit të Kuvendit është jashtë çdo arsyeje. Është për t’u marrë shembull sjellja e partive gjermane, që, megjithëse votimi për Kancelar në herën e parë dështoi të prodhonte rezultat, askush nuk e bëri temë ndërrimin e kandidatit dhe askush nuk kërkoi qeveri tranzicioni”, ka shkruar ai në Facebook.
