Deputetja e Aleancës për Ardhmërinë e Kosovës, Time Kadrijaj, tha se Lëvizja Vetëvendosje po e keqpërdor pozitën e kryesuesit për skenarët e saj.
Sipas saj, po propozohet komisioni për votim të fshehtë, por nuk dihet emri i kandidatit për kryeparlamentar.
“Ajo çfarë po ndodh vërtet është për keqardhje. Është shkelje ligjore dhe kushtetuese, është shkelje e rregullores së Kuvendit të Kosovës mënyra e ndryshimit të votimit. Dhe ajo çfarë po ndodh tash, po kërkojnë votë për formimin e një komisioni, ndërsa nuk e kemi emrin e kandidatit… Këtë herë nuk e dimë se për cilin kandidat po formohet ky komision dhe po procedohet. Nuk i kanë votat për formimin e këtij komisioni, nuk i kanë votat për lojërat e tyre politike që po i bëjnë dhe nuk ndryshojnë qasje. Kështu do të vazhdojnë, dhe faji është i Lëvizjes Vetëvendosje. Këto janë taktika të LVV-së që po e keqpërdorin pozitën e kryesuesit… po e keqpërdorin sepse është zotëri Dehari, i cili është i Lëvizjes Vetëvendosje dhe i gjori po punon sipas skenarëve të LVV-së“, tha ajo.
Ndonëse erdhi në seancë dhe foli para mediave, kreu i AAK-së, Ramush Haradinaj, nuk ishte i pranishëm në sallë gjatë seancës konstituive.
Lidhur me këtë, Kadrijaj tha se Haradinaj nuk ishte i pranishëm në seancën e sotme për shkak të agjendës.
Edhe në seancën e sotme konstituive, kryesuesi i kësaj seance, Avni Dehari, ripërsëriti propozimin për votim të fshehtë të kryeparlamentarit dhe nga partitë e tjera kërkoi emrat për formimin e komisionit ad-hoc për këtë votim.
Por, nga votimi u arritën të sigurohen vetëm 54 vota, ndërsa PDK, LDK, AAK, Nisma nuk morën pjesë fare në votim.
