Kryetari i Lidhjes Demokratike të Kosovës, Lumir Abdixhiku ka akuzuar Ministrinë e Kulturës për tentim të bllokimit të punimeve në Prishtinë.
Për punimet që kanë filluar të hënën në sheshin “Xhorxh Bush” në Prishtinë, ai ka thënë se një komision në një ministri me dy inspektorë tentuan të ndalin punimet me arsyetimin për mbrojte të trashëgimisë kulturore.
“Të paaftit dinë vetëm bllokadë! Për tre vite rresht kanë bllokuar në vazhdimësi Sheshin George Bush për një trashëgimi, mbikalimin në Dragodan po ashtu për trashëgimi; nënkalimin te Kuvendi sërish dhe natyrisht për trashëgimi. Kanë bllokuar Rrugën A për një rast të humbur në fund në gjykatë; Unazën e Jashtme me mos aprovim të një kredie pothuajse falë; Planin Zhvillimor Komunal me interesa të përçudnuara bizneso-partiake, e tatimet vetanake me ligje anti-kushtetuese!”, ka shkruar ndër të tjera Abdixhiku.
