Këtë deklaratë ai e dha në 23-vjetorin e zhdukjes së babait të tij, veprimtarit Ukshin Hotit.
“Nëse Serbia tenton të shfajësohet veten, unë e kam marrë shembull Ukshin Hotin në këtë rast, kjo tregon që Serbia edhe pas 23 viteve nuk ka hequr dorë nga mendja e saj kriminale”, tha Hoti në emisionin “Këndi i Debatit” në Tëvë1.
Ai gjithashtu deklaroi se asnjëherë më parë nuk është takuar me palën serbe. Mirëpo, sipas tij, institucionet e Kosovës nuk kanë fuqi të ushtrojnë ndikim më të madh në Serbi për fatin e të zhdukurve, por se kjo nuk mund të thuhet për Bashkimin Evropian e partnerët e Kosovës.
“Prej që jam kryetar i Komisionit dhe i Delegacionit, unë asnjëherë nuk jam takuar me palën serbe. Sinqerisht them pa asnjë mëdyshje, deri më sot nga institucionet e Republikës së Kosovës nuk kam pasur asnjë vështirësi dhe i kam pasur duart e lira për këtë proces. Kërkesa e familjarëve të personave të zhdukur, kërkesë edhe e imja, vazhdimisht ka qenë të bëhet presion më i madh ndaj Serbisë, por institucionet e Kosovës nuk kanë fuqi të bëjnë ndikim më të madh në Republikën e Serbisë. Mirëpo fuqi politike ka Bashkimi Evropian, partnerët tanë të Kosovës, dhe ne kemi kërkuar tërë kohën që këta të bëjnë presion më të madh ndaj Serbisë”, tha tutje ai.
Kujtojmë se sot janë bërë plotë 23 vite nga zhdukja e veprimtarit të Lëvizjes Kombëtare, profesorit dhe intelektualit Ukshin Hoti.
