Analisti, Xhevdet Pozhari ka vlerësuar se barrikadimet e partive politike lidhur me konstituimin e Kuvendit dhe formimin e qeverisë së re, janë më shumë inate se kërkesë për zbatim të ligjit, sa i përket debatit se a duhet të jap dorëheqje kryeministri dhe ministrave që janë zgjedhur edhe deputet.
Pozhari ka thënë se dhe LVV si parti fituese do duhej të ishte më tolerante, ndërsa partitë opozitare të legjislaturës së kaluar po këmbëngulin në diçka që është e paqartë.
“Mendoj në radhë të parë këtu është çështje inati, që janë pozicionuar partitë politike pa dallim, nga ai fituesi i zgjedhjeve që do të duhej të ishte më tolerantë, të kishte një fjalor më përbashkëtës dhe partitë që deri ‘dje’ kanë qenë në opozitë këmbëngulin në diçka që është e paqartë. Është mungesë e vullnetit sepse nëse kalohen inate mund të vijë te dakoordimi”, ka thënë Pozhari në emisionin “Këndi i Debatit” në Tëvë1.
Ai ka vlerësuar se me dallimet mes partive politike shqiptare, Kosova mund të ketë një qeveri të varur nga pakicat.
Pozhari ka thënë se Kosovës duke parë edhe zhvillimet në rajon e më gjerë i duhet një qeveri stabile.
“Me atmosfere politike mund të kemi një qeveri ku do të kenë një rol shumë të rendësishëm pakicat. Jam ithtar i ne qeverie stabile, që nënkupton qeveri e shumicës dhe jo e pakicës. Një qeveri që nuk do të kushtëzohet, shantazhohet, nuk do të bllokohet nga teket e një individi i cili mund të lëviz brenda natës për shkaqe të ndryshme. Një letër LVV ja ka dërguar LDK-së, pse nuk ka letër për PDK-në?!”, ka thënë Pozhari.
