Portieri Etrit Berisha e nisi rikthimin e tij te Kombëtarja e Shqipërisë me një moment për t’u harruar.
Në ndeshjen e dytë si titullar te Shqipëria në Ligën e Kombeve, Berisha u ndëshkua me karton të kuq ndaj Finlandës, ndërsa “kuqezinjtë” pësuan humbje 2:1.
Për Berishën, ky ishte kartoni i dytë kuq me fanellën e Shqipërisë, pasi të parin e kishte marrë para një dekade.
Kështu që, Berisha barazon Lorik Canën, me të cilin ndanë rekordin e dy kartonëve të kuq te Shqipëria, ndonëse listës i prinë Edin Murati që është ndëshkuar tri herë.
Berisha, tashmë renditet nëmesin e futbollistëve me më së shumti kartonë të kuq në historinë e Kombëtares së Shqipërisë.
Portieri u rikthye te Shqipëria, ku startoi në fitoren kundër Bjellorusisë dhe ishte titullar ndaj Finlandës, por deri në minutën e 22-të kur u përjashtua nga ndeshja.
Në tri ndeshje të luajtura deri më tani në sezonin e ri të Ligës së Kombeve, Shqipëria ka tubuar 6 pikë kurse duelin e fund të këtij grumbullimi e luan të martën mbrëma në Tiranë kundër San Marinos.
