Prokuroria Themelore në Ferizaj ka bërë të ditur se për vrasjen e policit Muhamed Lika që u vra mbrëmë në Kaçanik dyshohen dy persona.
Në një konferencë për media, Prokuroria tha se nga provat materiale të siguruara shihet se polici Muhamed Lika u vra nga dy të dyshuar të cilët akoma nuk janë identifikuar e as arrestuar.
Të njëjtit thuhet se kanë ikur nga vendi i ngjarjes në këmbë.
“Është vrarë pjesëtari i Policisë së Kosovës, i njëjti kur ka ndodhur rasti ka qenë duke u kthyer nga puna dhe në momentin e shkuarjes në banesën e tij nga persona të panjohur për momentin është qëlluar dhe nga plagët vdekjeprurëse ka ndërruar jetë. Nga provat që kemi marrë, shihet se aktin e kanë kryer dy persona e që janë larguar nga vendi i ngjarjes”, tha Burim Çerkini, kryeprokuror i Themelores në Ferizaj.
Çerkini deklaroi se hetuesit policorë dhe njësitë relevante janë në terren, të cilët po punojnë intensivisht për zbardhjen e vrasjes dhe motivet që e shkaktuan atë.
“Policia po e bën një punë të jashtëzakonshme për gjetjen dhe kapjen e autorëve të vrasjes. Jemi duke ndërmarrë të gjitha veprimet hetimore për t’i zbuluar arsyet dhe motivet që kanë çuar deri në kryerjen e kësaj vrasje të rëndë. Hetuesit policorë janë në terren për të identifikuar çdo provë që do të na lehtësojë në zbardhjen e kësaj vepre penale. Nga Policia e Kosovës janë ndërmarrë shumë veprime hetimore, ku janë intervistuar shumë persona”, deklaroi kryeprokurori.
“Të dyshuarit nuk kanë përdorur maska, por kapela. Ka qenë errësire dhe identifikimi bëhet më i vështirë. Nuk ka të bëjë me ndonjë pistë të grabitjes, nuk ekziston ndonjë pistë që të dyshuarit kanë pasur për qëllim grabitjen. Vërehet qartë që qëllimi i tyre ka qenë ekzekutimi i rreshterit”, tha Çerkini.
