Kanë mbetur me pak se dy javë kur Zyra e Rregullatorit pritet të marrë vendim për shtrenjtimin e energjisë elektrike.
E në rast që ZRRE vendos që tarifat të jenë më të larta, qytetarët do të paguajnë më shumë për rrymën e shpenzuar nga 1 prilli.
Por kryesuesi i bordit të Zyrës së Rregullatorit të Energjisë, Ymer Fejzullahu , ka dhënë opsion edhe një datë tjetër se kur do të hyjnë këto tarifa në fuqi.
“Jo, ende nuk është marrë vendimi. Në fuqi mbesin tarifat ekzistuese. Vendimi pritet të merret më 11 prill. Varësisht se si vendos bordi, tarifat mund të hyjnë në fuqi retroaktivisht nga 1 prilli ose nga 1 maji, kur është edhe periudha e faturimit, pasi nuk ka kuptim që kjo të ndodhë në mes të muajit”, ka thënë ai.
Rritja e çmimit të rrymës është kundërshtuar nga Presidentja, Vjosa Osmani e pjesëtarë të shoqërisë civile.
Kësisoj, eksperti i energjisë elektrike Vezir Rexhepi pret që ZRRE mos të ndryshojë çmimin e energjisë elektrike.
“Në këtë proces pres që në fund të fundit të përfitojnë konsumatorët, pra mendoj që ZRRE-ja të reflektoj bazuar në këto rekomandime, sugjerime dhe në aspektin ekonomik që përfshinë Kosovën. Prandaj mendoj që të jep një përgjigje të arsyeshme në mënyrë që të mos atakohen konsumatorët me një vlerë të tillë të rrijtjes së energjisë elektrike”, vlerëson ai.
Madje për rritjen e tarifave për 15% të energjisë elektrike, Instituti për Politika Zhvillimore ka shprehur shqetësim lidhur me faktin se ZRRE nuk ka publikuar asnjë propozim konkret mbi strukturën tarifore apo shpërndarjen e paralajmëruar të shtrenjtimit.
Mungesa e një propozimi të tillë, sipas INDEP, bën pothuajse të pamundur pjesëmarrjen e informuar të qytetarëve, konsumatorëve dhe shoqërisë civile në këtë proces konsultativ, gjë që sipas tyre, bie ndesh me obligimet ligjore që ZRRE ka për transparencë dhe pjesëmarrje aktive publike.
