Haradinaj është dënuar me katër vite e gjysmë burgim, duke llogaritur edhe kohën e kaluar në paraburgim dhe me një gjobë prej 100 eurove, raporton Teve1.info
Sipas trupit gjykues, Haradinaj duhet të paguaj shumën prej 100 eurove deri më 18 korrik të 2022.
Haradinaj është shpallur fajtor për këto pika.
“1. Për pengim të personave zyrtarë në kryerjen e detyrave zyrtare nëpërmjet kërcënimit të rëndë; 2. Pengim të personave zyrtarë në kryerjen e detyrave zyrtare nëpërmjet pjesëmarrjes në veprimin e përbashkët i një grupi; Pika 3. Frikësim gjatë procedurës penale; Pika 5. Shkelje të fshehtësisë së procedurës nëpërmjet zbulimit të paautorizuar të informacionit të fshehtë të nxjerr në procedura zyrtare; dhe pika 6. Shkelje të fshehtësisë së procedurës nëpërmjet zbulimit të paautotrizuar të identitetit dhe të dhënave personale të dëshmitarëve të mbrojtur.
Ndërsa, ai u shpall i pafajshëm për pikën katër, hakmarrje.
Hysni Gucati dhe Nasim Haradinaj u arrestuan më 25 shtator 2020 në Prishtinë, Kosovë, dhe u transferuan në njësinë e paraburgimit të DHSK-së, përkatësisht më 25 dhe 26 shtator 2020.
Seanca e paraqitjes së parë të Haradinajt dhe të Gucatit, si të dyshuar, para gjykatësit të vetëm, Nikola Giju, u mbajt përkatësisht më 29 shtator 2020 dhe më 1 tetor 2020.
Më 11 dhjetor 2020, Gjykatësi i Procedurës Paraprake Nikola Giju, konfirmoi aktakuzën kundër dy të akuzuarve. /teve1.info/
