Ky mos-koordinim Gjermani – Francë, vlerësohet se do të ketë ndikim edhe në zhvillimin e proceseve politike në Kosovë, marrë parasysh që edhe liberalizimi i vizave për Kosovën ka mbetur peng i një vendimi pozitiv në Francë.
Njohësi i çështjeve politike, Melazim Koci, thotë se qëndrimi jo i njëjtë franko-gjerman, do të minojë procesin e dialogut.
“Mendoj që shumë e dëmton ky mos-unitet Kosovën, sepse nxit, inkurajon pozicionin shumë të ngurtë, rixhid të Serbisë në raport me Kosovën. Minon dialogun dhe shtynë Kosovën drejt një konflikti të ngrirë pa epilog në dialog. Qëndrimi i ambasadorit të Francës në Beograd se kandidatura e Kosovës në Këshillin e Evropës është e njëanshme është e padrejtë dhe është i pasaktë. Nuk është i saktë sepse është i koordinuar qëndrimi, kandidatura me Gjermaninë dhe disa vende të tjera”, tha Koci.
Ndërsa, politologu Fidan Ukaj thotë se mungesën e unitetit mes dy fuqive evropiane do të rris mosbesimin e vendeve të Ballkanit ndaj BE-së.
“Është zhgënjyese një përçarje e tillë e dy motorëve të Bashkimit Evropian dhe krijon skepticizëm te qytetarët, sidomos të Kosovës që nuk kanë ende liberalizim të vizave. Por, mos të harrojmë edhe te qytetarët e Ballkanit Perëndimor e krijon një skepticizëm dhe tash së fundmi kemi parë një sondazh në Serbi, qytetarët serb janë më shumë për mos shkuarje të Serbisë drejtë Bashkimit Evropian, tha Ukaj.
Aplikimi i Kosovës në Këshillin e Evropës ishte një çështje e cila po ashtu ka vënë në pah qëndrimet jo të njëjta mes Francës e Gjermanisë.
Kronika e realizuar nga Valmir Gallopeni
