Kryeministri i Kosovës, Albin Kurti e ka akuzuar Serbinë për ndërhyrje të drejtpërdrejt në zgjedhjet parlamentare të 9 shkurtit në Kosovë.
Kurti ka deklaruar se kanë identifikuar shtatë instanca shtetërore e jo shtetërore të Serbisë që kanë ndërhyrë në proces zgjedhor.
Sipas tij i pari është presidenti i Serbisë, Aleksandër Vuçiq, i dyti është kryeterroristi Milan Radojcic dhe pastaj është Petar Petkovic.
“Në këtë skenë të ndërhyrjes kemi identifikuar shtatë instanca, apo aktorë shtetërorë dhe jo shtetërorë të Serbisë. I pari është presidenti i Serbisë, Aleksandër Vuçiq, i dyti është kryeterroristi Milan Radojcic, pastaj është Petar Petkovic, BIA serbe, mediat serbe të kontrolluara në Beograd, Lista Serbe dhe së fundmi është edhe struktura ilegale përfshirë këtu Bankën Postare Kursimore, qendrat sociale, zyrat e pensioneve, MTS – telekomi i Serbisë si dhe ish-pjesëtarë të Policisë së Kosovës”, ka thënë ai në një konferencë të përbashkët me ministrin për Komunitete dhe Kthime, Nenad Rashiq.
Ai po ashtu ka thënë se ministri Rashiq është kërcënuar vazhdimisht nga Milan Radoiçiqi dhe personat e afërt të tij.
“Ministri për Komunitete dhe Kthime, Nenad Rashiq në vazhdimësi është kërcënuar nga Milan Radoiçiqi dhe persona të afërt të tij duke tentuar që ta shantazhojnë me forma të ndryshme të fabrikimeve për t’ia dëmtuar reputacionin te votuesit serb dhe për ta detyruar që të tërhiqet nga gara. Ai dhe ministria që drejton gjithashtu kanë qenë cak edhe i sulmeve kibernetike me ç’rast profili i tij dhe i ministrisë në rrjete sociale janë hakuar”, ka deklaruar Kurti./teve1.info/
