Kryeministri i Kosovës, Albin Kurti, është takuar me komandantin e KFOR-it, gjeneral Major, Enrico Barduani, me rastin e vizitës së planifikuar të sekretarit të Përgjithshëm të NATO-s, Mark Rutte, në Kosovë më 11 mars.
Zyra e Kryeministrit ka bërë të ditur se gjatë takimit ata biseduan për çështjet e sigurisë.
“Gjatë takimit, u diskutua për përgatitjet për këtë vizitë të rëndësishme e më tutje edhe për çështjet e sigurisë dhe bashkëpunimin e vazhdueshëm mes institucioneve të Republikës së Kosovës dhe misionit të NATO-s. Qeveria e Kosovës bashkëpunon ngushtë me misionin e NATO-s në Kosovë, KFOR-in, për forcimin e sigurisë dhe paqes në rajon”, thuhet në njoftimin e ZKM-së./teve1.info/
