Ministria e Kulturës, Rinisë dhe Sportit ka bërë thirrje për mbështetje të projekteve në art, kulturë dhe trashëgimi kulturore për vitin 2025.
Qëllim i kësaj thirrje thuhet se është fuqizimi i skenës së pavarur kulturore, rritja e cilësisë së krijimtarisë artistike, identifikimi dhe mbështetja e talentëve të rinj, aktivizimi i tyre në vendimmarrje dhe aktivitete të fushës së artit dhe kulturës, rrjetëzimi dhe promovimi i produktit vendor kulturor si produkt konkurrues në tregun ndërkombëtar të industrisë kreative.
“OJQ-të dhe individët mund të aplikojnë në njërën nga kategoritë në vijim: Mbështetje organizative për organizatat me programe deri në tre vjet për zhvillim organizativ dhe programor për OJQ-të e artit, kulturës dhe trashëgimisë kulturore, organizimet tradicionale në fushën e artit, kulturës dhe trashëgimisë kulturore me program deri në tre vjet për zhvillimin e ngjarjeve përkatëse, projektet njëvjeçare dhe organizimet tradicionale të fushës së artit, kulturës dhe trashëgimisë kulturore, projektet dhe ngjarjet e njëhershme në fushën e artit, kulturës dhe trashëgimisë kulturore,si dhe projektet e krijuesve (artistëve) të rinj”, thuhet në njoftim.
Gjithashtu në njoftim bëhet e ditur se afati i fundit për aplikim është 26 marsi i këtij viti./teve1.info/
