Zëvendëskryeministrja e Ukrainës, Olha Stefanishyna, tha se Ukraina dhe SHBA-ja janë në “fazën përfundimtare të negociatave” për marrëveshjen e mineraleve.
Më herët, presidenti i këtij vendi, Volodymyr Zelensky, tha se kundërshton marrëveshjen që do t’i jepte SHBA-së qasje në mineralet e Ukrainës, në këmbim të mbështetjes ushtarake nga SHBA-ja.
Por, në një postim në rrjetet sociale, Stefanishyna tha se “ekipet ukrainase dhe amerikane janë në fazën përfundimtare të negociatave” në lidhje me marrëveshjen në fjalë.
“Negociatat kanë qenë shumë konstruktive, me pothuajse të gjitha detajet kryesore të finalizuara”, shkroi ajo në platformën X.
“Ne shpresojmë që liderët e SHBA-së dhe Ukrainës ta nënshkruajnë dhe ta miratojnë atë sa më shpejt në Uashington, në mënyrë që ne të shfaqim përkushtimin tonë për dekadat e ardhshme”, shtoi Stefanishyna.
Ukrainian and U.S. teams are in the final stages of negotiations regarding the minerals agreement. The negotiations have been very constructive, with nearly all key details finalized. We are committed to completing this swiftly to proceed with its signature. We hope both US and…
— Olga Stefanishyna (@StefanishynaO) February 24, 2025
Ukraina ka depozita të mëdha të elementeve dhe mineraleve të rëndësishme, përfshirë litium dhe titan, si dhe depozita të konsiderueshme të qymyrit, gazit, naftës dhe uraniumit.
Javën e kaluar, këshilltari për siguri kombëtare i Shtëpisë së Bardhë, Mike Waltz, tha se qasja e SHBA-së në mineralet e rralla në Ukrainë mund të shkëmbehej me ndihmë nga SHBA-ja, ose si kompensim për mbështetjen që i ka dhënë SHBA-ja deri më tash Ukrainës në luftën kundër pushtimit rus.
“Ne u dhamë ukrainasve një mundësi të jashtëzakonshme dhe historike”, tha Waltz, duke shtuar se kjo do të ishte “garancia më e mirë” e sigurisë për Ukrainën.
Por, Zelensky e refuzoi ofertën, duke thënë: “Unë nuk mund ta shes shtetin tonë”.
“Ne jemi të përkushtuar që ta përfundojmë këtë me shpejtësi dhe të vazhdojmë me nënshkrimin [e marrëveshjes]”, shkroi Stefanishyna të hënën në X./REL
