Sekretarja e Përgjithshme e PDK-së, Vlora Çitaku, ka përjashtuar mundësinë e koalicionit të PDK-së me Lëvizjen Vetëvendosje.
Çitaku ka thënë se Partia Demokratike e Kosovës e preferon një koalicion me partitë opozitare.
“Preferojmë një koalicion me partitë opozitare dhe përjashtojmë mundësinë e koalicionit me Lëvizjen Vetëvendosje, mirëpo hapat kushtetues dhe ligjor janë të qartë, të përfundojë procesi i numërimit të votave e të bëhet legjitimimi i deputetëve të rinj e më pas fillojnë konsultat dhe bisedimet me partnerët eventual të koalicionit që do të udhëhiqet nga Bedri Hamza”, ka thënë ajo në një konferencë për media të mbajtur të mërkurën.
Më tej ajo i ka bërë thirrje Komisionit Qendror të Zgjedhjeve që të sigurojë numërimin e saktë të çdo vote dhe të ruajë integritetin e procesit zgjedhor, duke garantuar siç ka thënë respektimin e vullnetit të qytetarëve.
“Integritet i procesit zgjedhor duhet të ruhet, i bëjmë thirrje KQZ-së që të sigurojë numërimin e saktë të çdo vote, duke garantuar respektimin e vullnetit të qytetarëve. Kosova ka zhvilluar një proces shembull demokratik dhe është e domosdoshme që të përfundojë si të tillë. Por do i presim procedurat kushtetuese, ky proces duhet të përmbyllet me integritet”, ka shtuar Çitaku.
Po ashtu Çitaku ka shtuar se PDK-ja është është e gatshme ta marrë përgjegjësinë e qeverisjes së Kosovës.
“Ky rezultat është dëshmi e rikthimit të besimit të qytetarëve dhe e rritjes sonë të jashtëzakonshme. PDK nuk e sheh këtë sukses si përmbyllje, por si një fillim të ri. PDK është e gatshme, me kandidatin tonë për Kryeministër, Bedri Hamzën, të marrë përgjegjësinë e qeverisjes dhe ta çojë Kosovën përpara,” ka theksuar ajo./teve1.info/
