Janë ngritur shqetësime të mëdha lidhur me sigurinë e faqes zyrtare të Komisionit Qendror të Zgjedhjeve (KQZ).
Ekspertët e sigurisë kibernetike kanë ngritur “alarme”, duke raportuar për prani të malware-ve që vjedhin të dhëna dhe që kanë për qëllim të dëmtojnë ose të marrin nën kontroll pajisjet pa leje.
Inxhinieri i Sigurisë Kibernetike, Korab Keqekolla ka bërë të ditur se ka mangësi të mëdha të sigurisë kibernetike në faqen e KQZ-së.
Ai ka paralajmëruar se faqja e KQZ-së është duke shpërndarë malware të rrezikshëm, i cili mund të vjedhë fjalëkalime, të dhëna financiare dhe informacione të tjera të ndjeshme.
“Kjo faqe zyrtare shtetërore po përdoret për të gjitha info stealers malware, një shumë e rrezikshëm për sigurinë kibernetike në nivel shtetëror”, ka paralajmëruar eksperti i sigurisë kibernetike.
Nga ana tjetër, kompania CACTTUS, e cila ka zhvilluar aplikacionin e numërimit të votave, ka sqaruar se platforma e KQZ-së ka përjetuar një vëllim të paprecedent trafiku, duke mbingarkuar sistemin CloudFlare.
Përmes një komunikate për media ata kanë pohuar se faqja e KQZ-së dhe infrastruktura qeveritare kanë qenë shënjestër e sulmeve të vazhdueshme DDoS, të cilat synojnë ndërprerjen e funksionimit të saj.
Ndërkohë, Prokuroria Themelore në Prishtinë ka kërkuar informacione nga KQZ lidhur me mosfunksionimin e platformës për publikimin e rezultateve zgjedhore, me qëllim hetimin e mundshëm të ndonjë vepre penale./teve1.info/
