Ushtarët izraelitë kanë vrarë 22 persona dhe kanë plagosur 124 në Libanin jugor, thotë ministria libaneze e shëndetësisë, pasi ushtria izraelite qëndroi në disa pjesë të vendit pas skadimit të afatit për tërheqjen e tyre dhe largimit të Hezbollahut nga zona.
Ministria e shëndetësisë tha se në mesin e të vdekurve ishin gra dhe të plagosurit përfshinin gjithashtu gra, fëmijë dhe një mjek.
Të dielën në mëngjes, mijëra banorë u kthyen në qytete dhe fshatra përgjatë kufirit, pavarësisht paralajmërimeve nga ushtritë libaneze dhe izraelite, si dhe OKB-ja, se rajoni mbetet i pasigurt.
Izraeli tha se marrëveshja 60-ditore e armëpushimit me Hezbollahun nuk është zbatuar plotësisht dhe mbetet e paqartë se sa prej ushtarëve të tyre mbetën në Liban ose sa kohë do të qëndronin.
Ushtria izraelite tha se kishte gjuajtur “të shtëna paralajmëruese në zona të shumta” të Libanit jugor, pa specifikuar nëse kishte goditur njerez, dhe ka kapur disa njerëz që pretendonte se përbënin një “kërcënim të afërt”, raporton BBC.
Marrëveshja e armëpushimit, e cila u ndërmjetësua nga SHBA dhe Franca, i dha fund konfliktit 14 muajsh, përcaktoi tërheqjen e trupave izraelite nga Libani jugor dhe largimin e luftëtarëve të Hezbollahut dhe armëve nga zona.
Në të njëjtën kohë, mijëra ushtarë libanezë pritej të vendoseshin në zonën ku, për dekada, Hezbollahu ka qenë forca dominuese.
Konflikti u përshkallëzua shtatorin e kaluar, duke çuar në një fushatë intensive ajrore izraelite në të gjithë Libanin, vrasjen e udhëheqësve të lartë të Hezbollahut dhe një pushtim tokësor të Libanit jugor.
Ofensiva vrau rreth 4,000 njerëz në Liban – duke përfshirë shumë civilë – dhe çoi në zhvendosjen e më shumë se 1.2 milion banorëve.
