Pavarësisht që kanë kaluar 24 vite nga lufta e fundit e Kosovës, Nuhi Ramadani e viziton këtë vend shumë shpesh.
Gryka e Llapushnikut, ka qenë vendi, ku Ramadani me shokët e tij apo siç quheshin “Ushtarët e Gurit” luftuan për çlirimin e Kosovës.
Ai e rrëfen edhe një histori të atyre ditëve të luftës që ndërlidhet edhe me këtë makinë të forcave serbe e cila ende ka mbetur në të njëjtin vend.
Atë kohë 32 e tani 55 – vjeç, Ramadani tregon përvojën e tij për tri ditët e “Betejës së Llapushnikut”.
Shpesh herë, ai bashkë me shokët dhe shoqet e tij që qëndronin në male, nuk e dinin as fatin e familjarëve.
Sipas tij, periudha me e gjatë pa komunikim me familjarë ka qenë katër muaj.
Ramadani tregon se në ditën e parë të luftimeve kishte ndodhur një plagosje të një ushtari. Në ditën e dytë, një pjesëtar i UÇK-së kishte humbur jetën, e në të tretën, ai thotë se kishte vetëm suksese, pasi që asnjë ushtarë nuk ishte vrarë apo plagosur.
Për nder të kësaj beteje, u ngrit lapidari me 23 dëshmorë dhe 21 martirë të rënë gjatë asaj periudhe të luftës së lavdishme për liri.
Raporti i gazetares Fetije Kamberi.