Profesoresha Hatixhe Latifi – Pupovci ka thënë se ky ka qenë një sulm krejtësisht i pa pritur dhe i shkaktuar nga motive të pa kuptueshme.
“Ka qenë një sulm krejtësisht i pa pritur dhe i pa provokuar, i shkaktuar nga motive të pa kuptueshme për mua. Studenti i pakënaqur me notën e provimit ka mënyra të tjera akademike për të kërkuar drejtësinë, ndërsa ndërhyrja e prindit është krejtësisht e pa pranueshme”, ka shkruar ajo.
Më tej, profesoresha ka thënë se është për keqardhje që ky prind është edhe vet mjek dhe nuk e kupton rëndësinë e mbajtjes së kritereve në lëndët kyçe në fakultet. Madje, sipas saj, ky nuk është rasti i parë, ku personi i i cili e ka sulmuar atë ka tentuar që t’i zgjidhë problemet përmes dhunës.
“Është për keqardhje që ky prind, edhe vet mjek, nuk e kupton se sa me rëndësi është mbajtja e kriterit në një lëndë kyçe për formimin e çdo mjeku të ardhshëm. Por, zgjedh dhunën si rrugë për arritjen e qëllimit të vet. Si duket specialisti i gjinekologjisë, dr. Arsim Gashi, nuk e ka herën e parë që përmes dhunës tenton t’i zgjidh problemet. Prandaj pres që ta merr dënimin e merituar”, ka përfunduar Latifi- Pupovci.
Hatixhe Latifi-Pupovci është bashkëshortja e zëvendësministrit të Arsimit, Dukagjin Pupovci.
