Deputetja e Lidhjes Demokratike të Kosovës, Hykmete Bajrami, ka reaguar ndaj deklaratës së ministrit të financave, Hekuran Murati, se opozita nuk po i voton marrëveshjet ndërkombëtare.
Bajrami ka thënë se Murati nuk ka përgjigje për mashtrimet elektorale dhe prandaj sipas saj po del dhe po e fajëson opozitën për dështimet 4-vjeçare.
“Ministri i cili çdo ditë krenohet se e ka ulë borxhin publik, sot paska vajtu qysh opozita katër vjet nuk e ka lënë me hy në borxh. Jo zotri, me 9 shkurt qytetarët kanë me të gjyku ty se ty t’i kanë dhanë 51%, ata të kanë votu me kry punë e jo me u anku se gjoja opozita të paska pengu. A po të kujtohet vetja kur ke qënë në opozitë? A don me ta rikujtu me video? Kësaj qeverie i ka ”pengu” Gjykata Kushtetuese, Prokuroria, Policia, i ka ”pengu” opozita, Parlamenti, i ”pengon” edhe ardhja e Viti te Ri. Ministri i dështimeve ekonomike duhet të tregojë pse se ka bërë TVSH-në zero për miell, për vaj, për qumësht, për gjërat elementare? Natyrisht se s’ka përgjigje për mashtrimet elektorale e tash po del dhe po e fajëson opozitën për dështimet 4-vjeçare. Me ty minister, larg po me duket 9 shkurti”, ka shkruar ajo në Facebook.
Ministri i Financave, Hekuran Murati të mërkurën ka thënë se për marrëveshjet ndërkombëtare, përveç pozitës, nevojiten edhe ato të opozitës që ato të kalojnë në Kuvend.
“Për kalim të marrëveshjeve ndërkombëtare nevojiten 80 vota, që nënkupton se përveç votave të pozitës, nevojiten edhe votat e opozitës në mënyrë që të mundësohet kalimi i tyre. Kësaj radhe, megjithëse mandati ishte i plotë, kjo legjislaturë e Kuvendit po e përmbyll mandatin pa i votuar marrëveshjet ndërkombëtare të mbetura”, ka shkruar Murati në Facebook.
Murati: Opozita s’po i voton marrëveshjet ndërkombëtare, po mendon se po i bën dëm Qeverisë
