Skuadra e Bashkimit nuk ka vonuar shumë për të zëvendësuar të larguarin Maliek White, me të cilin e ndërpreu bashkëpunimin javën e shkuar.
Të hënën, ekipi nga Prizreni që garon në elitën e basketbollit kosovar, ka njoftuar se Erik Copes është përforcimi më i ri dhe do të jetë pjesë e Bashkimit për pjesën e mbetur të këtij sezoni.
Copes, në fakt rikthehet te Bashkimi pasi ishte pjesë e ekipit edhe sezonin e shkuar dhe ishte ndër lojtarët më të dalluar.
Qendra amerikane, së fundmi ka bërë karrierë në Izrael, ku ishte pjesë e ekipit Elitzur Yavne dhe kishte një mesatare prej 6 pikëve e 4 kërcimeve në tri ndeshje të luajtura në kampionat.
Sezonin e shkuar, Copes me fanellën e Bashkimit ka luajtur me një mesatare prej 17 pikëve dhe 8 kërcimeve për ndeshje.
Basketbollisti i gjatë 204 centimetra, do të jetë “armë shtesë” e Bashkimit nën kosh për pjesën tjetër të sezonit 2024/25.
