Kapiteni i Kombëtares së Shqipërisë, Ardian Ismajli përfundimisht do të largohet nga Empoli për të bërë hapin e madh në karrierë, transferimin të ndonjë skuadër më e madhe.
Mediumet italiane kanë raportuar se Ismajli ka refuzuar rinovimin e kontratës me Empolin, veprim ky që bënë me dije se e ardhmja e tij është diku tjetër.
Ismajli ka kontratë me Empolin deri në fund të këtij sezoni dhe mbetet të shihet nëse do të largohet në verë si lojtar i lirë apo në afatin kalimtar të janarit, ku ekipi që do ta transferoj do të duhet të paguajë një dëmshpërblim të vogël.
Interesim për Ismajlin ka kohë që kanë treguar Juventusi, Interi dhe Napoli, me këtë të fundit që po shihet favorit për transferimin e tij.
Më herët është raportuar se Ismajli ka marrëveshje me Napolin pasi po kërkohet me ngulm nga trajneri Antonio Conte, i cili po e sheh si përforcim të duhur për mbrojtjen.
28-vjeçari prej vitit 2021 është pjesë e Empolit kur iu bashkua nga Spezia dhe këtë sezon ka regjistruar 18 paraqitje në të gjitha garat.
Ai është kapiten i Empolit dhe ndër mbrojtësit më të vlerësuar këtë sezon në kampionatin e Italisë.
