Qeveria e Kosovës ka vendosur që të ndajë nga 100 euro për fëmijët dhe pensionistët për fundvit.
Këtë e ka bërë të ditur kryeministri i Kosovës, Albin Kurti të dielën gjatë një konference për media.
“Pra të dashur fëmijë të gjithë ju që jeni të moshës 0 deri në 16 vjet dhe që jeni pranues të shtesave mujore për fëmijë do t’i përfitoni nga 100 euro secili. Kjo nuk është vetëm një dhuratë e fundvitit nga shteti i juaj, por është një investim në mirëqenien e të gjithë fëmijëve pa dallim. Përveq fëmijëve duhet të kujdesemi që t’i mbështesim edhe ata që kontribuan dhe e ndërtuan shtetin e na sollën deri këtu. Prandaj sikurse tashmë e kemi bërë traditë që sa herë që ka buxhet të mjaftueshëm dhe ekonomia rritet përtej projeksioneve, në fund të vitit po ndajmë mbështetje shtesë të njëhershme nga 100 euro për të gjithë pensionmarrësit. Kjo shënon herën e pestë brenda mandatit tonë që një mbështetje e tillë shpërndahet te pensionistët tanë. Andaj edhe në këtë fundvit sipas tashmë traditës sonë nga 100 euro për fëmijët dhe pension marrësit”, ka thënë Kurti./teve1.info/
