Skuadra e Bashkimit është gjobitur me 1500 euro dhe një ndeshje pa shikues për shkak të incidentit pas përfundimit të ndeshjes me Golden Eagle Yllit, që u zhvillua të dielën e shkuar në Prizren dhe i takoi xhiros së 12-t të Superligës së Kosovës në basketboll.
Bashkimi është dënuar me një mijë euro sipas nenit 51.8 të propozicioneve të garave që parashikon gjobë për “tentim të sulmit fizik ndaj lojtarëve, zyrtarëve të klubeve, gjyqtarëve, vëzhguesit apo personave zyrtarë nga persona jozyrtarë”.
Ndërkohë, 500 euro gjobë, Bashkimi i ka marrë për “hedhje të gjësendeve të forta në fushë, të ciulat mund të shkaktojnë lëndime të lehta”.
Ndeshja e xhiros së 12-të mes Bashkimit dhe Yllit, të cilin e fitoi ekipi nga Suhareka, përfundoi me incident.
Me të përfunduar ndeshje, në parket kanë hyrë disa tifozë vendas duke krijuar tollovi, ndërsa FBK-ja ka njoftuar se tifozët e Bashkimit kanë dashur të sulmojnë personat zyrtarë të takimit.
Këtë ndeshje e ka drejtuar treshja e gjyqtarëve Artan Gashi, Amar Gjekoviq e Dren Pudarolli.
