Kritika ndaj procedurës së miratimit të njërit prej ligjeve kryesore në reformën në drejtësi, adresojnë njohësit e ligjit. Sipas tyre, është e papranueshme që brenda pak orësh, pa përfillje të rregulloreve dhe legjislacionit, të miratohet projektligji për Byronë.
Brenda një seance, brenda pak orësh, u miratua në lexim të parë dhe në lexim të dytë, Projektiligji për Byronë Shtetërore për Verifikimin dhe Konfiskimin e Pasurisë së Pajustifikueshme.
Kjo formë e procedimit të një projektligji që vlerësohet si kyç për reformat në drejtësi, vlerësohet se bie në kundërshtim me rregulloren e Kuvendit dhe legjislacionin në fuqi.
“Ky manovrim i mazhorancës, që brenda pak minutash apo në çështje orësh, të kalojnë në dy lexime të ligjit për Byronë për Verifikimin dhe Konfiskimin e Pasurisë së Pajustifikueshme. Ne kemi theksuar se një projektligj i tillë, siç është ligji i Byrosë, shumë i ndjeshëm, ligj që ndërhyn edhe në të drejtat pronësore të personave të cilëve do t’iu verifikohet pasuria, nuk do duhej asesi të kalonte pa pasur paraprakisht konsultim publik apo diskutim e debat parlamentar në Kuvendin e Kosovës. Gjithashtu, ligji u miratua në lexim të dytë, por nuk pati dëgjim publik në Kuvend, ashtu siç kërkon rregullorja e punës së Kuvendit dhe legjislacioni në fuqi. Prandaj, shihet kjo nguti e Qeverisë për ta votuar jo vetëm këtë projektligj, por edhe ligje të tjera të cilat ishin në pritje të Kuvend, si dhe disa vendime të u nxorën dje, shpërfaqin ngutin e mazhorancës parlamentar që t’i shfrytëzojë sa më mirë dhe sa më shumë këto projektligje vetëm sa për qëllime të zgjedhjeve apo fushatës elektorale”, ka thënë anëtari i KDI-së, Vullnet Bugaqku
E papranueshme dhe si procedurë që mund të çojë në dështimin e kësaj nisme, po konsiderohet veprimi i mazhorancës në seancën e së enjtes.
“Një procedurë e tillë e miratimit të kësaj nisme edhe çdo nisme tjetër legjislative, është absolutisht e papranueshme. Nuk është në pajtim me standardet që kërkohen në procesin e ligjbërjes dhe si rezultat i miratimit të nismave të tilla, pa proces të mirëfilltë të konsultimeve, përfshirjes së akterëve kyç, ka rezultuar me dështim të një numri të konsiderueshëm të nismave legjislative”, tha avokati Ardian Bajraktari.
Në qershor të këtij viti, Gjykata Kushtetuese, rrëzoi projektligjin për Byronë, duke e shpallur si të pavlefshëm në tërësi.
Mangësi në këtë projektligj, paraprakisht kishte evidentuar edhe Komisioni i Venecias.
