Ish-deputeti nga radhët e komunitetit boshnjak, tani këshilltar për komunitete në MPJD, Qerim Bajrami, ka thënë se vizita e kryeministrit të Kosovës, Albin Kurti në Sarajevë është e rëndëishme për boshnjakët që jetojnë në Kosovë, por edhe për Bosnjë e Hercegovinën.
Reagimin e presidentit të entitetit të Republikës Serbe në Bosnje Hercegovinë, Milorad Dodik për vizitën e Kurtit, që u bë shkak i anulimit të Samitit të Liderëve të Ballkanit Perëndimor dhe BE-së, ka thënë se nuk është befasi.
Ai ka thënë se Dodik është vegël e Putinit dhe Vuçiqit dhe vizita e Kurtit i ka goditur.
Vizitë e rëndësishme edhe për ne këtu por edhe për Bosnje e Hercgovinën.
“Besoj që do të ketë një pranim të mirë nga qytetarët e Bosnjës. Kurti ka një vlerë të madhe atje tek kroatët dhe boshnjakët. Dodikut nuk mund të presim dicka tjetër, e dijmë që është kundërshtar i shqiptarëve dhe boshnjakëve në Bosnje. Është kukulla e Putinit dhe Vuçiqit. Këta janë goditur me vizitën e kryeministrit dhe ai e ka gjet mënyrën dhe momentin të shkojë atje”, ka thënë Bajrami në emisionin “InfoNata”.
Ai ka thënë se Bosnja e Hercegovina është një shtet i komplikuar pasi vendimi për njohje të Kosovës është i pamundur pa miratimin edhe të etnitetit të Republikës Serbe.
Pavarësisht anulimit të samitit i paraparë të mbahet me 4-5 dhjetor, kryeministri Kurti të enjten në mbrëmje ka arritur në Sarajevë. Ai atje do të ketë disa takime.
“Kryeministri do të realizojë një vizitë të shkurtër në Sarajevë, ku do të ketë takime me përfaqësues të institucioneve dhe përfaqësues politik, si dhe do të marrë pjesë në një organizim të organizatës joqeveritare Asociacioni i Intelektualëve të Pavarur Krug 99”, tha ai.
Qeveria e Kosovës këtë vit ka marrë vendim për heqjen e një anshme të lëvizjes së lirë për qytetarët e Bosnje e Hercegovinës.
