Kjo e premte shënon një vjetorin e vrasjes së Liridona Ademaj, e deri në këtë periudhë Prokuroria Themelore në Prishtinë ende nuk ka ngritur aktakuzë për tre të dyshuarit, njëri nga ta edhe ish bashkëshorti i saj. Familja e saj kërkojnë që sa më shpejt të kryhet një veprim i tillë derisa sipas njohësve të ligjit, kjo kohë në aspektin ligjor është brenda afatit dhe ka raste kur merr kohë edhe më shumë se një vit.
29 nëntorin e vitit të kaluar, u vra Liridona Ademaj.
E i dyshuari kryesor për vrasjen është ish bashkëshorti i saj, Naim Murseli dhe dy të tjerë.
Ajo dyshohet se u vra rrugës për në shtëpi në prani të dy djemve të saj të mitur që ishin në veturë.
E pavarësisht që kanë kaluar një vit nga ky akt, për tre të dyshuarit nga Prokuroria Themelore në Prishtinë ende nuk ka aktakuzë.
Sipas tyre, janë ende në fazën e hetimeve.
“Lidhur me rastin për të cilin kërkoni informata, ju njoftojmë se prokurori i shtetit në bashkëpunim dhe koordinim me Policinë e Kosovës janë duke i ndërmarrë të gjitha veprimet e nevojshme hetimore lidhur rastin në fjalë dhe se duke marrë parasysh që lënda në fjalë vazhdon të jetë në fazën e hetimeve, nuk mund të jepen më shumë informata rreth këtij rasti”, thuhet nga Prokuroria Themelore e Kosovës.
Që një aktakuzë të ngritët sa më shpejt ka kërkuar vëllai i Liridonës, Leonard Ademaj.
Ai në një përgjigje për Tëvë1, ka thënë se janë duke bashkëpunuar me institucionet për zbardhjen e rastit.
“Ne si familje jemi në kontakt të vazhdueshëm me prokurorin për aq sa ata po munden të na gjejnë kohë, edhe pse ne do të kishim dashur që të takohemi më shpesh. Sidoqoftë, vrasja e Liridonës është një ndër rastet me të rënda qe ka ndodhur vendit tonë, si për nga natyra e viktimës ashtu edhe për nga veprimet kriminale e dinake ndaj një burri kundër një nëne para fëmijëve të tyre. E kuptojmë që prokuroria duhet të përgatisë aktakuzën sipas ligjit dhe në mënyrë profesionale dhe për këtë ka afat ende në bazë të ligjit. Por ngritja e një aktakuzë sa më shpejtë dhe dënimi maksimal që parasheh Kodi Penal i RKS është një lehtësim për ne si familje dhe për gjithë popullin sakrifikues e dashamirës të Kosovës”, tha Leonard Ademaj.
Mirëpo kjo vonesë në aspektin ligjor është në rregull sipas avokates Fehmije Gashi Bytyqi.
Ajo thotë se hetimet e kalibrit të tillë mund të marrin kohë më shumë se një vit.
Mirëpo ndryshe mendojnë organizatat për të drejtat e grave.
Adelina Berisha nga Rrjeti i Grave thotë se me këto vonesa, sistemi i drejtësisë ka dështuar për t’i mbrojtur gratë.
Televizioni i ka dërguar pyetje edhe Ambasadës së Suedisë në Kosovë për këtë çështje, se a janë duke kryer edhe shteti suedez hetime për vrasjen e saj mirëpo të njëjtit të premten nuk kanë dhënë detaje.
