Ministri i Financave, Hekuran Murati ka thënë se tashmë e disa kohë kanë punuar në ndryshimin e sistemit të arkave fiskale.
Sipas tij, arkat do të ndërrohen nga ato hardwerike në arka fiskale softuerike apo dixhitale.
“Tash e sa kohë kemi punuar që të ndryshojmë sistemin e arkave fiskale, nga ato hardëerike siç është aktualisht, në arka fiskale softwerike apo dixhitale. Sot e bëmë edhe lansimin e sistemit të ri, duke demonstruar edhe live se si funksionon“, ka shkruar ai në Facebook.
Murati tha se sistemi i ri që kanë ndërtuar mundëson komunikimin me ofruesit e softëerit përmes API, që sipas tij, nënkupton hapjen e tregut, pra më shumë konkurrencë dhe rrjedhimisht edhe kosto shumë më të lirë të operimit.
“Pra, mjafton një laptop/kompjuter, dhe një printer termik, që një biznes të mund të lëshojë kuponë fiskalë, pa pasur nevojë të blihen arka fiskale të shtrenjta. Sistemi i ri gjithashtu mundëson komunikimin edhe me aplikacion që skanon QR kodin e secilit kupon fiskal, duke hapur rrugë për skema të ndryshme nxitëse që shpërblejnë qytetarët të cilët marrin kuponin fiskal. Në vijim, do të bëjmë edhe plotësimin e udhëzimit administrativ, për të mundësuar fillimin e pilotimit me sistemin e ri. Do t’ju mbajmë të njoftuar për çdo zhvillim tjetër në këtë fushë. Stay tuned! Qeveria dixhitale!”, ka thënë Murati.
