Trajnimet e FSK-së, do të ketë lëvizje të automjeteve ushtarake në dy fshatra të Prishtinës

Sot dhe në vikend, FSK-ja do të zhvillojë trajnime në terren në fshatrat Butovc dhe Zllatar të Komunës së Prishtinës.

Gjatë kësaj periudhe, do të ketë lëvizje të automjeteve ushtarake dhe sipas njoftimit, ky është një trajnim i planifikuar dhe nuk ka arsye për shqetësim.

“Ju informojmë se Forca e Sigurisë së Kosovës (FSK) do të zhvillojë trajnime në terren në Komunën e Prishtinës, sipas planit të paraparë. Gjatë datave 15-17 nëntor 2024, FSK do të jetë e pranishme në këto zona: Fshati Butovc dhe Fshati Zllatar. Gjatë kësaj periudhe, do të ketë lëvizje të automjeteve ushtarake në këto fshatra. Ky është një trajnim i planifikuar dhe nuk ka vend për shqetësim. Ju faleminderit për mirëkuptimin tuaj!”, ka thënë komuna e Prishtinës në njoftim.

FSK më 12 nëntor ka përfunduar ushtrimin “Ujku i Çeliktë”, i cili sipas ministrit të Mbrojtjes, Ejup Maqedonci, është më i madhi i realizuar ndonjëherë nga Ushtria e Kosovës.

Në këtë ushtrim morën pjesë mbi 1 mijë ushtarë.

Për ta parë këtë ushtrim, prezentë ishin edhe dy krerët e shtetit, presidentja Vjosa Osmani dhe kryeministri Albin Kurti.