Një sulm fizik ka ndodhur brenda Ministrisë së Kulturës. Ushtruesi i detyrës së sekretarit të përgjithshëm në këtë ministri, Xheladin Krasniqi dyshohet se ka sulmuar një zyrtar të kësaj ministria. Ministri Hajrullah Çeku tha se janë duke pritur raportin e policisë së Kosovës. E të enjten para kësaj ministri u mbajt një protestë e heshtur nga punëtorët e MKRS-së.
Brenda zyrave të Ministrisë së Kulturës të martën ndodhi diçka jo shumë e zakontë.
Në këtë vend dyshohet se ushtruesi i detyrës së sekretarit të përgjithshëm Xheladin Krasniqi, ka sulmuar fizikisht zyrtarin Miftar Latfin.
Motivet e kësaj përleshje fizike nuk dihen ende kurse ministri Hajrullah Çeku nuk dha detaje duke thënë se policia po merret me rastin.
“Informatat jemi duke i marrë, faktet duke i kontrollu, besoj edhe Policia po e kryen pjesën e saj që është shumë e rëndësishme në këto raste. Dhuna ose sulmi fizik është i papranueshëm, i patolerueshëm dhe absolutisht i dënueshëm”, u shpreh Çeku.
Pas këtij sulmi që ndodhi brenda këtij institucioni, dhjetëra punëtor të Ministrisë së Kulturës të enjten mbajtën një protestë.
E gjithë protesta ishte e heshtur.
Por mesazhet e tyre i barten përmes këtyre mbishkrimeve.
“Sot e mbaj maskën sepse punoj në ambient toksik e as nuk kam liri për tu shprehur lirshëm” “Më kanë fyer, kërcënuar kontrolluar e frikësuar”, ishin disa prej porosive që këta punëtor i përcollën në këtë protestë.
Tëvë 1 ka dërguar pyetje edhe në Polici, por deri në momentin e transmetimit të kronikës nuk ka marrë përgjigje për rastin.
