Ai duke folur për zhvillimet e fundit në këtë gjykatë e cila ditë më parë deponoi akuza shtesë kundër Hashim Thaçit, Kadri Veselit, Rexhep Selimit dhe Jakup Krasniqit, tha për Tëvë1 se ky organ është duke u ndikuar politikisht.
“Progresi i Gjykatës Speciale deri më sot ka qenë i ngadalshëm. Ndonëse është e vërtetë që Gjykata është nën presion të konsiderueshëm për të siguruar që proceset e saj janë të rrepta dhe aktakuzat e saj janë të forta, është e pamundur të besohet se vetëm këto shpjegojnë pse nuk kanë filluar ende proceset gjyqësore. Krijimi i gjykatës u ndikua shumë nga politika dhe është e paimagjinueshme që funksionimi i gjykatës të mos ndikohet nga politika”, tha ai.
Tutje, profesori thotë se Gjykata Speciale po rrezikon stabilitetin politik dhe shoqëror të Kosovës.
“Testi i vërtetë i kësaj gjykate do të jetë kur të fillojnë gjykimet dhe veçanërisht kur të jepen vendimet. Në anën tjetër mijëra shqiptarë të Kosovës që ende presin lajme për fatin e të afërmve të tyre të zhdukur, pa dyshim do të pyesin veten pse nuk janë ndërmarrë përpjekje të ngjashme për të zbardhur fatin e tyre. Gjithashtu ideja që liderët e UÇK-së të portretizohen si kriminelë dhe jo si heronj, ka të ngjarë të ketë implikime serioze për stabilitetin politik dhe shoqëror në Kosovë”, është shprehur ai.
Televizioni ka pyetur Zyrën e Prokurorit nëse do ketë përsëri akuza shtesë në aktakuzën ndaj Thaçit e të tjerëve mirëpo Zëdhënësi Prokurorisë së Specializuar, Christopher Bennett, ka thënë se nuk flasin për këtë çështje.
Në aktakuzën e re, prokurori Jack Smith ka përfshirë disa krime të pretenduara në dy fshatra të Suharekës dhe një konvikt në Gjilan, për të cilat akuzohen ish-drejtuesit e lartë politikë e ushtarakë të Ushtrisë Çlirimtare të Kosovës.
Kronika e realizuar nga Shpat Blakçori
