Presidentja e Kosovës, Vjosa Osmani, ka konfirmuar se mes Kosovës dhe Britanisë së Madhe së fundmi është arritur marrëveshje në fushën e emigracionit.
Përmes një postimi në Facebook ka njoftuar se është takuar me kryeministrin britanik Keir Starmer me të cilin ka thënë se ndër të tjera kanë diskutuar edhe për këtë marrëveshje.
“Bashkëpunimi në fushën e sigurisë dhe mbrojtjes si dhe marrëveshja e arritur së fundmi mes dy vendeve tona në fushën e emigracionit, ishin në fokus të diskutimit me Kryeministrin e Mbretërisë së Bashkuar, Keir Starmer. Kosova është mirënjohëse për mbështetjen e palëkundur të Mbretërisë së Bashkuar”, ka shkruar Osmani në Facebook.
Ndryshe, së fundmi nga mediat britanike është raportuar se Britania e Madhe do të nënshkruajë marrëveshje me Kosovën, Serbinë dhe Maqedoninë e Veriut për parandalimin e bandave që merren me kontrabandimin e emigrantëve.
Sipas njoftimit, qëllimi i këtyre partneriteteve, të të njëjtit lloj si ai që Britania nënshkroi me Shqipërinë në fund të vitit 2022, është “të rrisë shkëmbimin e inteligjencës dhe të përgjojë bandat kriminale që merren me kontrabandimin e emigrantëve”./teve1.info/
