Kryeministri i Shqipërisë, Edi Rama, është shprehur optimist se për shqiptarët nuk do të ndërrojë asgjë fitorja e Donald Trump në zgjedhjet në Shtetet e Bashkuara të Amerikës.
Sipas Ramës nuk përbën dallim të madh se kush është në Shtëpinë e Bardhë, pasi siç ka thënë shqiptarët janë populli më pro amerikan në Evropë.
“Ajo që ndodhi në SHBA nuk duhet të shihet si shqetësim, përkundrazi mund të jetë mundësi e mirë për të bërë gjërat në mënyrë më ndryshe për ne dhe për botën. Për Shqipërinë nuk ndërron asgjë, shqiptarët janë komuniteti më pro-amerikan në Evropë, pra kushdo që është në Shtëpinë e Bardhë nuk do të ketë ndryshime, Amerika është Amerikë, nuk jemi të ndikuar nga emocionet sepse për ne është gjithçka e njëjtë. Mendoj se ka pasur shumë ngazëllim, ndoshta jo në rrugën e duhur për rikthimin e mundshëm të Trumpit dhe kur ishte president në mandatin e parë të gjithë thanë se NATO-ja do të dobësohet, por u forcua. Ta shohim. SHBA-ja është SHBA-ja, nuk do të thotë se është keq për Evropën, ndoshta mund të jetë diçka e mirë për Evropën. Çka ndodh në SHBA nuk duhet ta shohim si shqetësim për ne”, ka thënë Rama para samitit të Komunitetit Politik të Evropës në Budapest./teve1.info/
