Kryeministri Kurti ka takuar sot kryetarët e Komunave, ku ndër temat kryesore ishte Strategjia Kombëtare për menaxhimin dhe kontrollin e qenve me dhe pa pronar. Ai kërkoi nga Komunat të caktojnë lokacionet për strehimin e qenve, derisa tha se duhet fuqizuar bashkëpunimin me Komunat për shkak të interesit të qytetarëve.
Strategjia Kombëtare për menaxhimin dhe kontrollin e qenve me dhe pa pronar dhe ndërlidhja e qytetarëve me adresë zyrtare i bëri bashkë kryetarët e komunave me krerët qeveritar.
Kryeministri, Albin Kurti me ministrin e Administrimit të Pushtetit Lolak, Elbert Krasniqi e atë të Financave, Hekuran Murati diskutuan bashkë me kryekomunarët për këtë problematikë.
Kurti tha se çështja e qenve endacakë po rëndohet çdo herë e më shumë për çka u bëri thirrje atyre të caktojnë bashkë me Ministritë lokacionet për ndërtimin e qendrave strehuese për ta.
Ndër të tjera, shefi i ekzekutivit theksoi se duhet fuqizuar bashkëpunimi me komuna pasi kjo ndikon në interesin e qytetarëve dhe shtetit, derisa u bëri thirrje kryetarëve të komunave që të fillojnë me sistemin e arsimit dual, pasi disa prej tyre ende nuk kanë filluar.
Po ashtu edhe ministri i Administrimit dhe Pushtetit Lokal, Elbert Krasniqi tha se problematika e qenve endacak kërkon qasje të shpejtë dhe reagim institucional.
