Një aksident i rëndë ka ndodhur mbrëmjen e së shtunës në magjistralen Gjilan – Prishtinë. Vetura e cila po lëvizte në drejtim të Prishtinës ka rënë në Liqenin e Badocit, ku si pasojë tre të rinj rreth moshës 20-vjeçare kanë humbur jetën. Nga Policia e Kosovës kanë thënë se kanë nisur një hetim për zbardhjen e rrethanave që çuan deri tek ky aksident.
Një telefonatë urgjente, bëri që te Liqeni i Badocit të dalin organet e rendit.
Mbrëmjen e së shtunës, një automjet teksa po lëvizte në magjistralen Gjilan – Prishtinë kishte humbur drejtimin.
Si pasojë e kësaj vetura me tre persona brenda kishte rënë në Liqenin e Badocit.
Këtij aksidenti nuk arritën t’i mbijetonin tre të rinj që ishin brenda veturës.
Nder të parët që arritën në vendngjarje, ishin nga Federata e Peshkimit të Kosovës.
Pas 20 minutave kërkime, këta arritën ta lokalizonin veturën në thellësinë e liqenit.
“Kemi ardhur një grup prej pesë personave, jemi futur me anije brenda, pas diku gjysmë orë e kemi gjetur veturën me ato spirancat dhe mjetet që i kemi. Pastaj kanë ardhur FSK-ja, zhytësit dhe e kanë nxjerrë veturën. Sipas informacioneve prej zhytësve, dy kanë qenë jashtë veturës ndërsa njëri ka qenë në veturë”, tha Halim Metolli, pjesëtar i FPSRK-së.
Vendi ku u lokalizua vetura në liqen, ndodhej gati 20 metra nga bregu.
Për këtë ekipeve të FSK-së, iu deshën 4 orë, që t’i nxjerrë trupat e pajetë të R.P, A.G dhe Sh. të gjithë rreth moshës 20-vjeçare.
“Vetura është nxjerrë e fundit diku rreth orës 05:00 të mëngjesit derisa e kanë kontrolluar vendin në të gjitha anët. Rreth orës 03:00 pas mesnatës ia kanë nis me i nxjerrë trupat”, tregoi Metolli.
Ndërkohë, rastin e kanë konfirmuar edhe në Policinë e Kosovës.
Këta thonë se kanë nisur një hetim për zbardhjen e rrethanave që çuan deri tek ky aksident.
“Mbrëmë rreth orës 23:00 kemi pranuar informatën se në rrugën Gjilan -Prishtinë, ka ndodhur një aksident trafiku me pasoja fatale. Në këtë aksident, ka qenë i përfshirë, një automjet në lëvizje. Si pasojë e aksidentit kanë mbetur të vdekur tre persona. Vdekjen e viktimave e ka konstatuar ekipi mjekësor në vendngjarje. Aktualisht policia ka nisë një hetim për zbardhjen e rrethanave që kanë quar deri te ky aksident trafiku.”, u tha nga Policia e Kosovës.
Ndryshe, tragjedia e së shtunës mbrëma ndodhi te devijimi i rrugës në magjistralen Gjilan – Prishtinë, ku edhe po zhvillohen punimet për ndërtimin e Urës së Badocit./teve1.info/
