Nxënësja në gjimnazin “Bedri Pejani” në Pejë ende nuk është rikthyer në bankat shkollor. Ani pse kishte një kërkesë nga MASHTI që nga dita e premte, një gjë e tillë nuk ka ndodhur. Kjo për shkak se siç mëson televizioni, nga DKA po kërkojnë një vendim nga Ministria për rikthimin e vajzës.
18-vjeçarja A.D, bashkë me nënën e saj erdhën mëngjesin e së martës në shkollën “Bedri Pejani”.
Por, dyert e këtij institucioni arsimor në Pejë ishin të mbyllura për nxënësit e vitit të tretë.
Që ta kthejë të bijën në shkollë, nëna e vajzës pati edhe një debat me drejtorin.
Por, mësimi 18 vjeçares nuk iu mundësua.
Ani pse Ministria e Arsimit kërkoj nga kjo shkolle që nxënësja e cila u mbulua ti rikthehet procesit mësimor, një gjë e tillë nuk ndodhi as me 1 tetor.
E as drejtori i arsimit, në komunën e Pejës, Naser Gega, nuk ishte i qasshëm për prononcim.
Sipas burimeve të Tëvë 1, arsyeja e mos kthimit të A.D në shkollë, është se Ministria e Arsimit nuk iu ka dërguar drejtorisë një vendim për një gjë të tillë, por vetëm kërkese përmes email-it
Madje siç mësoi televizionit, të martën Gega pati edhe një takim me Ministren e Arsimit, Arbërie Nagavci rreth kësaj çështje.
Që nxënësja do të rikthehet të hënën në gjimnazin “Bedri Pejani”, pati premtime të shumta nga deputetë, aktivistë e zyrtarë të MASHTI-it.
“Ky nuk është rasti i parë që ndodh në Pejë, mirëpo ka pasur premtime që vajza do të rikthehet në shkollë, premtimet kanë qenë publike bile ka pasur edhe nga zyrtarët e Ministrisë siç është zëvendësministri i arsimit, që kanë premtuar që vajza do të rikthehet ajo gjë ka ndodhë më shumë kemi parë deklarime për merita se sa për realizime konkrete”, tha gazetari lokal, Valdrin Daci.
Televizioni ka kërkuar përgjigje nga MASHTI rreth takimit me drejtorin e arsimit në komunën e Pejës, por nuk ka marrë përgjigje deri në momentin e publikimit të kronikës.