Skuadra e Pejës, sonte do ta zhvilloj ndeshjen e parë në kualifikimet e Fiba Europe Cup.
Pejanët, do të marrin pjesë për herë të tretë në këto gara, teksa do të përballen me skuadrën greke Maroussi.
Verdhezinjtë, nuk patën një start të mirë në Superkupën e Kosovës, ku u eliminuan nga Prishtina, teksa po ashtu mirë nuk e nisën dhe Superligën, ku në xhiron e parë u befasuan nga Vëllaznimi.
Të përzgjedhurit e Rami Hadar, synojnë të kalojnë kualifikueset dhe të jenë pjesë e grupeve në FIBA Europe Cup, ashtu si edhe edicionin e kaluar, ku kishin paraqitje mjaft të mira në grupe me dy fitore e katër humbje.
Te Peja, pritet që të debutoj dhe përforcimi më i ri i tyre, qendra amerikane Darnell Cowart, teksa pritet të mungoj qendra tjetër Adong Makoi, kurse dhe Jacquez Yow, pritet ta zhvilloj ndeshjen e parë zyrtare pas lëndimit.
Shqiponjat edhe ndeshjen e kthimit do ta zhvillojnë në Greqi, për shkak të problemeve në palestrën Karagaqi në Pejë.
Ndeshja e kthimit zhvillohet 2 ditë më vonë, pra me datën 26 shtator.
Ndeshja Peja – Maroussi, do të transmetohet drejtpërdrejt në kanalin zyrtar të FIBA-së në Youtube.
Pjesë e grupeve të FIBA Europe Cup është konfirmuar Trepça, derisa më 27 shtator, do të dihen përfundimisht 40 skuadrat, që do të formojnë grupet për edicionin e ri.
