Në fund të këtij muaji, do të mbahet turneu i Superkupës së femrave në basketboll për të paralajmëruar sezonin 2024/25.
Federata e Basketbollit të Kosovës, të martën ka njoftuar se skuadra Peja 03 do të jetë organizatore e turneut të Superkupës.
Peja 03 në këtë organizim do ta ketë bashkëpunëtore edhe Federatën e Basketbollit të Kosovës, në mënyrë që turneu të mbahet në mënyrën më të mirë të mundshme.
Superkupa e basketbollisteve do të mbahet prej datës 30 shtator deri më 4 tetor dhe të gjitha ndeshjet do të luhen në palestrën “Karagaçi” në Pejë.
Në këtë turne të Superkupës, do të paraqiten të gjitha gjashtë skuadrat që do të luajnë në Superligën e femrave për sezonin e ri: Bashkimi, Prishtina, Peja 03, Penza, Trepça dhe Junior 06.
Kjo është hera e parë që Superkupa të femrat mbahet me këtë sistem, ku përgjatë pesë ditëve do të zhvillohen pesë ndeshje: çerekfinalet, gjysmëfinalet dhe finalja e madhe.
Bashkimi dhe Prishtina, janë kualifikuar automatikisht në gjysmëfinale të Superkupës si kampion dhe nënkampion të sezonit të shkuar, ndërsa për dy vendet tjera në gjysmëfinale do të luajnë Peja 03, Penza, Trepça dhe Junior 06.
“Gjatë këtyre ditëve të Superkupës, skuadrat e Superligës do të kenë mundësinë të kryejnë testet finale para fillimit të kampionatit 2024/25”, ka shkruar ndër të tjera FBK-ja në njoftimin e saj.
Skuadra e Bashkimit nga Prizreni, në dy sezonet e shkuara ka triumfuar në Superkupë, trofe që e ka fituar katër herë në histori të klubit.
Në fakt, basketbollistet e Bashkimit ishin superiore në dy sezonet e fundit, duke fituar në total gjashtë trofe, pra dy herë “tripletën”: Superkupën, kupën dhe titullin e kampionit.
