Kreu i Aleancës për Ardhmërinë e Kosovës, Ramush Haradinaj ka thënë se përgjegjësi kryesor për situatën e rënduar në veri të Kosovës është presidenti serb, Aleksandër Vuçiq.
Sipas tij, ai ka sabotuar çdo nismë për vendosjen e normalitetit dhe integrimin e serbeve në institucionet e Kosovës, ka minuar procesin e dialogut për njohje, ka urdhëruar serbët lokal të braktisin jetën institucionale dhe i ka urdhëruar serbët t’i braktisin zgjedhjet, raporton teve1.info
Haradinaj theksoi se me Serbinë ka veç një zgjidhje, e që sipas tij është njohja e ndërsjellë në kufijtë ekzistues.
Më tej, Haradinaj ka komentuar edhe kërkesat e Vuçiqit ndaj Kosovës, teksa theksoi se këto kërkesa janë vazhdimësi e luftës së tij kundër Kosovës.
“Për situatën e rënduar në veri të Kosovës, përgjegjësi kryesor është presidenti serb. Ai ka sabotuar çdo nismë për vendosjen e normalitetit dhe integrimin e serbëve në institucionet e Kosovës. Ai e ka minuar procesin e dialogut për njohje. Ai i ka urdhëruar serbët lokal të braktisin jetën institucionale. Ai i ka urdhëruar ata t’i braktisin zgjedhjet. Ai i ka mbështetur grupet kriminale dhe i ndikuar edhe nga Rusia, ka hartuar skenar për destabilizimin e Kosovës. Prandaj kërkesat e tij sot, janë veç vazhdimësi e luftës së tij kundër Kosovës.“ – ka shkruar Haradinaj në Facebook.
Kreu i AAK-së, tha se terrenin për veprimet anti-Kosovë të Serbisë e ka krijuar politika shkurtpamëse e qeverisë Kurti.
“E dhimbshme, por fatkeqësisht terrenin për këto veprime anti-Kosovë të Serbisë, të mbështetura edhe nga disa qarqe ndërkombëtare, e ka krijuar politika shkurtpamëse e qeverisë Kurti. Ajo ka bërë që politika fashiste e Serbisë ndaj Kosovës, të mos duket edhe aq e keqe.“ – u shpreh ai.
“Me Serbinë ka veç një zgjidhje, njohja e ndërsjellë në kufijtë ekzistues.“ – përfundoi Haradinaj.
