Sulmuesi Mirlind Daku nuk do të largohet nga skuadra e Rubin Kazanit, të paktën deri në janar të viti të ardhshëm.
Reprezentuesi i Kombëtares së Shqipërisë, pritet të mbetet pjesë e ekipit rus deri në verën tjetër, pasi afati kalimtar në Rusi ka përfunduar të enjten mbrëma.
Në ditën e fundit të afatit kalimtar, Rubini thuhet se refuzoi oferta deri në 13 milionë euro për Dakun, për të cilin interesim kishin shprehur Spartaku i Moskës dhe Krasnodari.
Te Rubin Kazani e vlerësojnë lart Dakun dhe e shohin ndër lojtarët kyç të ekipit pas formës së treguar sezonin e shkuar dhe sezonin aktual.
26-vjeçari ka shënuar 5 gola dhe ka bërë 3 asistime në 7 ndeshje kampionale këtë sezon, ndërsa me Rubin Kazanin ka kontratë deri në verën e vitit 2026.
Ai është pjesë e Rubin Kazanit prej verës së shkuar kur iu bashkua nga Osijeku i Kroacisë për 1.2 milionë euro.