Policia e Kosovës është duke zhvilluar një aksion policor në veri të vendit.
Aksioni po zhvillohet për mbylljen e strukturave paralele serbe në qendrën kordinuese në mahallën e Boshnjakëve raporton teve1.info
Aksioni është duke u zhvilluar edhe në Zubin Potok në sallën sportive dhe në qendrën spitalore në veri.
Edhe Policia e Kosovës përmes një komunikate e ka konfirmuar aksionin, ku thuhet se qëllimi i aksionit është vendosja e rendit dhe ligjëshmërisë dhe ndërpreja e aktiviteteve në pesë objekte të cilat janë shfrytëzuar në cilësi të komunave ilegale, e të cilat janë në kundërshtim me rendin juridik kushtetues.
Ky operacion është nisur me kërkesë të Ministrisë së Administrimit dhe Pushtetit Lokal.
“Policia e Kosovës, bazuar në kërkesën e Ministrisë së Administrimit dhe Pushtetit Lokal, në bashkëpunim dhe koordinim me institucionet përkatëse të Kosovës dhe organeve të drejtësisë, është duke zhvilluar një operacion policor në katër komuna në veri të Kosovës. Qëllimi i operacionit policor është vendosja e rendit dhe ligjshmërisë dhe ndërprerja e aktiviteteve në pesë objekte të cilat janë shfrytëzuar në cilësi të komunave ilegale, e të cilat janë në kundërshtim me rendin juridik kushtetues. Operacioni policor është duke vazhduar, ndërsa për informacione shtesë do të informoheni pas përfundimit të operacionit”, thuhet në komunikatë.
