Ish-ambasadori i Kosovës në Shqipëri, Sylë Ukshini, ka thënë se hapja e urës së Ibrit duhet të ndodhë dhe se Qeveria ka bërë mirë që ka hapur këtë temë.
Ai duke folur për qëndrimet e BE-së dhe ShBA-së, se tani nuk është koha për hapjen e urës, ka thënë se nëse tani nuk ka kushte për një gjë të tillë, prilli i vitit të ardhshëm do të duhej të ishte limiti kohor.
Sipas, tij kjo periudhë është më e përshtatshmja.
“Nëse momenti i përshtatshme për ta hapur urën e Ibrit nuk është tani, për shkak që kemi zgjedhje në Kosovë, zgjedhje në SHBA, atëherë mendoj që marsi ose prilli i vitit të ardhshëm duhet të jetë një limit kohor që nuk duhet të shtyhet. Mendoj që duhet të ipet një sinjal i qartë edhe në Beograd dhe tek serbët lokal që pretendojnë të shkaktojnë turbullira do të përballen me ligjin”, ka thënë ai në emisionin “Ditari” në Tëvë1.
Të enjten për këtë temë ka folur edhe presidentja e Kosovës, Vjosa Osmani. Ajo ka thënë se duhet të ketë koordinim me aleatët për hapjen e urës së Ibrit, por ka kundërshtuar kërkesën e BE-së që kjo çështje të diskutohet në Bruksel.
Edhe KFOR-i në reagimet për këtë zhvillim ka bërë thirrje që çështja të zgjidhet në dialog, duke thënë se kanë kapacitete dhe janë të gatshëm të përgjigjen pas çdo sfide.
Koordinimin me ndërkombëtarët të mërkurën e ka përmendur dhe kryeministri Kurti, duke shtuar se hapja e urës nuk është kundër askujt e aq më pak ndaj partnerëve.
Ndërsa, ambasadori amerikan në Kosovë, ka thënë se hapja e urës së Ibrit në këtë kohë paraqet rrezik edhe për ushtarët e KFOR-it, përfshirë edhe ata amerikanë.
