Ministri i Administrimit të Pushtetit Lokal, Elbert Krasniqi, i ka kërkuar emisarit të Bashkimit Evropian për dialogun Kosovë – Serbi, Miroslav Lajçak, duke i shtruar pyetje se çfarë ndodhi që Bashkimi Evropian e ndryshoi qëndrimin nga “hapja e urës pa vonesa të mëtutjeshme” në “duhen më tepër bisedime”.
Krasniqi, i ka thënë Lajçak se Bashkimi Evropian deri tani e ka cekur vazhdimisht se ‘ura duhet të hapet për qarkullimin e automjeteve pa vonesa të mëtutjeshme’, ndërsa tani po thotë se kjo çështje duhet të diskutohet në dialog.
“I dashur Miroslav Lajçak, BE-ja vetëm së fundi ka thënë se çështja e urës së Mitrovicës duhet të diskutohet në dialog. Më herët, e ka cekur vazhdimisht se ‘ura duhet të hapet për qarkullimin e automjeteve pa vonesa të mëtutjeshme’, sipas Raportit për Vendin (CR) mes viteve ’18-’22. Është e qartë se ka një ndryshimi në qëndrimin e BE-së për të njëjtën çështje. Kështu, do të ishte korrekte t’u thuash njerëzve pse ky ndryshim? Çfarë ka ndryshuar nga viti 2023 për dallim me 2022 për BE-në që të kalojë nga ‘hapja e urës pa vonesa të mëtejshme’ te ‘duhen më shumë bisedime?’”, ka shkruar ai në platformën “X”.
Dear @MiroslavLajcak, the EU has only recently said that the issue of the Mitrovica bridge must be discussed in the Dialogue. Before, it had stated repeatedly that “the bridge should be opened to vehicle traffic without further delays or obstruction”, as per CRs between ’18-’22.
— elbertkrasniqi (@elbertkrasniqi) August 15, 2024
Ndryshe, Lajçak një ditë më parë në një postim në “X” tha se BE-ja vazhdimisht e ka theksuar se “çështja e urës së Mitrovicës duhet diskutuar në dialog”.
“BE-ja ka theksuar vazhdimisht se çështja e urës së Mitrovicës duhet të diskutohet në Dialogun e lehtësuar nga BE-ja. Pretendimet se BE-ja është kundër hapjes së urës ose ka ndryshuar pozicionin e saj janë çorientuese”, ka shkruar ai.
Lajçak: Pretendimet se BE-ja është kundër hapjes së urës së Ibrit – çorientuese
