Pajaziti në emisionin “Info Nata” në Tëvë1, ka thënë se nga institucionet e Kosovës kërkohet që të jenë më të vëmendshme në menaxhimin e kësaj situate.
“Si të tilla incidente në veri nuk është hera e parë, nuk është ndonjë risi, ka pasur incidente të vazhdueshme kryesisht të nxitura nga eksponentë serbë. Shqetësimi më i madh nuk është regjioni krejtësisht i qetë, për shkak asaj që po ndodh rreth nesh apo më saktë në Ukrainë, pra ka tendenca të tilla të zgjerimit të konfliktit dhe kjo e bën më shqetësuese situatën, nuk është që ka ndonjë element konkret deri më tash. Ajo çka kërkohet që institucionet tona të jenë më të vëmendshme, jo institucionet e sigurisë por politikën e sigurisë, në kuptimin e menaxhimit të kësaj situate”, tha ai.
Ai thotë se është fat i mirë që Kosova ka institucionet ndërkombëtare që garantojnë sigurinë e vendit.
“Për fat të mirë ne kemi institucionet ndërkombëtare të sigurisë që garantojnë ende dhe fuqishëm sigurinë në vendin tonë. Kjo nuk është që na bën që ne të flemë në gjumë, por të kujdesemi nga ana tjetër që të menaxhojmë situatën në mënyrën e duhur. Ajo çka duhet tash një menaxhim i situatës, një transparencë më e madhe, nga këto situata nuk duhet të bëhen kualifikime të ngutura. Situatën në veri më shumë se sa ne e dinë partnerët tanë, ne nuk kemi nevojë t’i japim mesazhe atyre nga studiot televizive ose nga qëndrimet politike me konferenca shtypi, ka nevojë që të jemi transparentë para qytetarëve”, tha më tej Pajaziti. /teve1.info/
