Forcat e Sigurisë së Kosovës kanë filluar një stërvitje nën vëzhgimin e Komandës Amerikane për Evropë.
Krasaj saj, është edhe njësiti i Ndërhyrjes së Shpejtë në kuadër të Policisë së Kosovës, bashkë me Trupat Special të Forcave të Armatosura të Shqipërisë.
“Gjatë stërvitjes #ValorShield24, trupat specialë të njësive tona simuluan skenarë të ndryshëm, përfshirë operacione të zbulimit taktik, operacione psikologjike, analizimin e të dhënave të zbulimit, përdorimin e dronëve gjatë fazave të zhvillimit të operacioneve për goditjen e objekteve, si dhe parandalimin e veprimeve të grupeve taktike sulmuese”, thuhet nga Ministria e Mbrojtjes.
Pjesëmarrja në këto lloj stërvitjesh, llogariten si shpërfaqje e progresit të punës së FSK-së.
“Në botë situata ka ndryshuar, apo më mirë le të themi, ka eskaluar bukur shumë në kuptimin e sigurisë. Nga ky këndvështrim FSK është parë si një faktor i rëndësishëm dhe serioz, prandaj vet Komanda e NATO-s për Evropë e ka parë të arsyeshme duke u mbështetur në vlerësimet për rreziqet në regjion, ta mbështesë FSK-në në këto trajnime, ku natyrisht partner më i afërt për FSK-në është Ushtria Shqiptare”, ka vlerësuar Hysen Gecaj, ish- kolonel.
Edhe koha se kur po mbahet kjo stërvitje, nuk po vlerësohet se është rastësore.
“Kjo stërvitje do të ndikojë në ngritjen e kapaciteteve të FSK-së dhe Policisë Speciale. Sipas pikëpamjes sime, koha dhe momenti kur është duke u mbajtur kjo stërvitje, ka një mesazh për shkak se dihet fare mirë që rajoni kërcënohet çdo ditë e më shumë nga influenca ruse”, ka thënë Selam Shkodra, ish-zëvendësministër i Mbrojtjes.
Trajnime të herë pas hershme, FSK zhvillon edhe në kampin Bondsteel.
