Për dy javë, gjashtë herë është sulmuar Policia e Kosovës në veri të vendit. Këto sulme dyshohet se po vijnë nga territori i Serbisë në drejtim të Kosovës.
Sulmi i fundit ka ndodhur mëngjesin e së martës ndaj një njësie patrulluese kufitare në fshatin Zupç të Zubin Potokut. Ku përveç dëmeve materiale, nuk ka persona dhe zyrtarë të lënduar.
Banorët serbë të kësaj ane, thonë se nuk e dinë arsyen se pse këto sulme po ndodhin.
Gjatë së martës, rrugëve të veriut të vendit, u panë forca të shtuara të Policisë së Kosovës. Dy autoblinda me zyrtarë të Njësisë Speciale, u pozicionuan afër pikës kufitare të Bërnjak.
Mirëpo pavarësisht këtyre sulmeve, banorët shqiptarë në Mitrovicë, nuk ndjehen të rrezikuar. Ata thonë se janë nën mbrojtje të Policisë së Kosovës.
Për herë të parë Policia e Kosovës u sulmua më 13 prill. Nga ajo periudhë, nuk ka asnjë person të arrestuar për këto sulme.
Raporti i gazetares Fetije Kamberi.
