Raporti i fundit i BQK-së, vlerësohet se shpërfaq mungesën e menaxhimit të mirë të parasë publike nga ana e Qeverisë. E vlerat e larta të importit, llogaritet të jenë reflektim i politikave jo të mira ekonomike.
Indikacion për mosmenaxhim të mirë të parasë publike nga ana e ekzekutivit, vlerësohet se tregohet në raportin e fundit financiar të Bankës Qendrore të Kosovës.
Kjo për shkak se janë rritur depozitat e Qeverisë në BQK, që nënkupton mosshpenzim të parasë publike.
“Sa i përket bilancit bankar ajo çka është më shqetësuese vërehet se në tre muajt e fundit kemi rritje të depozitave të Qeverisë në llogarinë e Thesarit që është në Bankën Qendrore. Dhe kjo është një informatë dhe tregues, që paraqet një gjendje jo të mirë të menaxhimit të parasë publike, apo një keqmenaxhim të parasë publike, sepse kemi mosrealizim të projekteve investive, projekteve kapitale dhe planeve të parapara buxhetore gjatë një periudhe fiskale”, ka thënë Bashkim Mustafa professor i ekonomisë.
Deficit në vlerë 1.8 milionë euro, është bilanci tregtar në mallra deri në fund të muajit maj.
Për periudhën e njëjtë kohore, rritje pësuan edhe importi e eksporti.
Importi prin me mbi 2 miliardë euro, kurse eksporti me 373 milionë euro.
Investimet direkte në Republikën e Kosovës sipas BQK, deri në fund të majit kapën vlerën 341.22 milionë euro.
Mirëpo, edhe këto vlera vlerësohet se nuk janë të kënaqshme.
“Kemi një investim direkt shumë të varfër edhe në këtë raport, për faktin se nuk ka politika të mirëfillta ekonomike. Por edhe këto remitanca, që janë të mirëseardhura, për fat jo të mirë nuk janë të orientuara në investime, por vetëm rreth patundëshmërive, të cilat sidoqoftë e luajnë një rol ekonomik. Por, e mira do të ishte që ato të ishin investime direkte, që për fat jo të mirë, nuk ka diçka konkrete”, shprehet Mustafë Kadriaj, njohës i ekonomisë.
Sipas të dhënave të BQK, dërgimet e mërgatës tejkaluan 512.96 milionë euro.
