Kryetari i Lidhjes Demokratike të Kosovës (LDK), Lumir Abdixhiku, u ka kërkuar akterëve publikë që ta bojkotojnë Radiotelevizionin e Kosovës (RTK).
Abdixhiku ka thënë se LDK-ja nuk do të ketë asnjë bashkëpunim me RTK-në pa shkarkimin e militantëve të partisë në pushtet që janë vënë në krye të mediumit publik.
Sipas tij, LDK-ja nuk ka reaguar në zhvillimet e fundit që përfshin RTK-në, pasi thotë se qëndrimi i tyre është i ditur tash e një vit e gjysmë. Ka shtuar se kanë kuptuar edhe ndikimin në RTK të “grupit të politbyrosë nga Tirana”.
“Një vit e gjysmë më parë ne kishim kuptuar kapjen e plotë të politikave redaktoriale të RTK-së nga pushteti popullist. Kishim kuptuar dhe ndikimet direkte të ‘Grupit të PolitByrosë nga Tirana’ dhe gjithë rreziqet propaganduese që buronin nga një konstrukt i tillë. Fatkeqësisht, në atë kohë dhe që nga ajo kohë, ne mbetëm të vetëm. Bojkoti ynë, përkundër konsideratës për gazetarët me integritet që i gjeje brenda RTK-së aty këtu, mbeti veçse një paralajmërim. Madje, nga shumë akter politik u pa si një mundësi e mirë e marrjes së hapësirës së lënë nga ne. Disa madje dhe e harruan. Siç tha një komentator gjumi këto ditë, pse nuk reagoi LDK për sulmet e RTK-së?! Ndërsa ne në bojkot!”, ka shkruar Abdixhiku.
Abdixhiku ka thënë se pas një viti e gjysmë merr edhe më shumë kuptim bojkoti i LDK-së ndaj RTK-së.
“Ato janë përfundime konstatuese të shqetësimeve serioze mbi rrënimet fundamentale të vlerave të shoqërisë. Dhe herët apo vonë do të dalin secila! Si ajo e kapjes së RTK-së; si ajo e ‘Grupit të PolitByrosë nga Tirana’; si e ajo propagandës së sondazheve e mbi të gjitha, e dëmeve të mëdha antishtetare që pushteti i majtë popullist ka shkaktuar për katër vjet!”, ka shkruar tutje Abdixhiku.
Partia e Abdixhikut nga shkurti i vitit 2023 vendosi ta bojkotojë RTK-në pas zgjedhjes së Rilind Gërvallës si drejtor të kanalit në gjuhën shqipe RTK 1, 3 dhe 4. LDK-ja e pati akuzuar Gërvallën si njeri të Lëvizjes Vetëvendosje.
RTK-ja ditë më parë publikoi lajmin e një mediumi boshnjak, duke shkruar që dy media të Kosovës financohen nga Serbia. Kjo më pas rezultoi që nga lajmi janë distancuar një numër i madh gazetarësh e redaktorësh të transmetuesit publik./teve1.info/
