KQZ-ja ka filluar të bëjë përgatitjet për zgjedhjet e ardhshme.
Që nga mjetet për shenjimin e votuesëve, kabina të votimit e deri tek kamerat dhe pajisjet përcjellëse në vendvotime.
Por këto, nuk janë parapërgatitjet e vetme për zgjedhje.
“Harmonizimi i akteve nënligjore apo rregullave zgjedhore me ligjin e ri për Zgjedhjet e Përgjithshme, që është miratuar vitin e kaluar nga Kuvendi i Kosovës. Dhe zhvillimi i një softueri, i cili bëhet me ndihmën e OSBE-së dhe ka për qëllim të digjitalizojë shumë nga operacionet zgjedhore”, ka thënë zëdhënsi i KQZ-së, Valmir Elezi.
Në kuadër të shërbimeve online, janë aplikimet për regjistrim të votuesëve jashtë vendit, të personave me aftësi të kufizuara, aplikimi për certifikim të subjekteve politike dhe kandidatëve, e po ashtu edhe paraqitja e rezultateve preliminare dhe përfundimtare.
E sfida për KQZ-në pritet të jetë edhe zbatimi i ligjit të ri për Zgjedhje.
“Këto ndryshime përfshijnë si procesin brenda vendit, ashtu edhe procesin e regjistrimit dhe votimit jashtë vendit. Por, ka edhe çështje të tjera të cilat janë ndryshuar me këtë ligj, të cilat përfshijnë qoftë numërimin e fletëvotimeve, pastaj nevojën për të themeluar qendrat komunale të numërimit, tregon Elezi.
Të gjitha këto përgatitje, llogariten të jenë brenda afateve kushtetuese.
“Zgjedhjet duhet të shpallen sipas ligjit për zgjedhje të përgjithshme, më së herti është gjashtë muaj para përfundimit të mandatit 4 vjeçar, dhe më së voni katër muaj para përfundimit të atij mandate”, ka thënë ish-kryetari i KQZ-së, Mazllum Baraliu.
Periudha më e vonë në të cilën mund të mbahen zgjedhjet, janë 60 ditë para përfundimit të mandatit qeverisës.
